Sunny Side Up مطعم

كانت لنا تجربة في مطعم
Sunny Side Up
الواقع في مجمع التجارية في مدينة الكويت

المطعم تلقونه اول ما تدخلون المجمع على ايدكم اليمين .. مطعم كويتي أكله ناطع و ديكوراته تشرح القلب مرتبه

الفلبينية يحليلها لابسه ثوب

ديكوراتهكم عندهم شوية فناتق الحين .. حاطين على كل طاولة اسم منطقة من مناطق الكويت و معلقين على الطوفه صور خفيفة دم حق بعض الفنانات العالميات مثل بيونسيه و شاكيرا و غيرهم و اهما باللبس الكويتي

المنيو عندهم ايباد تشوفون صور الطلبات اللي تبون تطلبونها

الاجواء حلوه و هاديه و المكان مرتب و الاكل لذيذ بس يعيبهم التاخير في الطلبات يعني قعدنا ننطر بين المقبلات و الاطباق الرئيسية وايد ، مع ان اللي يشتغلون هابين ريح و مو مقصرين معانا بس التأخير اللي مخرب

طلبنا مقبلات عبارة عن كبب مشكله و ورق عنب

و انا طلبت لي ماهيتو بارد يسرسح

و طلبت لي مجبوس لحم عن الخاطر صارلي جم يوم اتحلاه و رفيجي طلب طبق دياي و عيش مادري شنو اسمه نسيت

الدقوس على كتر يا زينه

صحونهم كاتبين عليهم جمل تونس .. فناتق

و لما تدققون في الديكور راح تلاحظون لوحات تضحك معلقينها حق فنانين مصريين قدامى مثل اسماعيل ياسين مع جمل طريفة

الفاتورة اييبونها في صندوق مبيت صغير و اسعارهم معقوله مو غاليه 

Sunny Side Up مطعم

مكانهم مجمع التجارية – الدور الارضي
مدينة الكويت

انستغرامهم
@SunnySideUpkw

246 total views, no views today

Peppermint فيلم

هذا الاسبوع كانت محطتنا السينمائية مع فيلم
Peppermint

و طبعا كالعادة اختيارنا كان لسينما جراند في الحمرا

الفيلم بالنسبة لي ما عجبني وايد لكن عجب الناس ، حسيت ان اعلان الفيلم كان اقوى من الفيلم نفسه و هذي خدعه يلجئون لها المنتجين عادة علشان يشدون الجمهور و يحضرون الفيلم

يتكلم الفيلم عن انتقام ام انقتل زوجها و بنتها جدام عيونها ، القصة مكررة بس كان ممكن تكون الاحداث مشوقه اكثر

عموما الفيلم ممتع في حال ماكو شي يديد بالسينما روحو شوفوه ضيعو وقت

اعلان الفيلم

318 total views, no views today

فلاورز لاتيه كافيه

خلال وجودي في المباركية مرينا سومو و اكتشفنا الكافيهات هناك

شدني كافيه اسمه فلاورز لاتيه .. دخلنا و اكتشفناه

الكافيه اجوائه أوروبية و الديكور هادي و مريح

الديكورات مستوحاة من
vintage designs

كلها ترجع لتفاصيل أوروبية بحتة

القعدة برا حلوة و شرحة بس يبيلها جو حلو

المنيو بالايباد علشان تشوفون الطلبات على كيفكم

طلبت شاي اخضر مع النعناع و كانت طريقة تقديمه حلوه

صاحبي طلب له عشا و مدح اكلهم وايد

تقدرون تطلبون حلو و تختارونه معروضه جدامكم

تفاصيل الديكور و الموسيقى مريحة و تاخذك جو ثاني الصراحه

فلاور لاتيه مكانهم في سومو – سوق المباركية في مدينة الكويت
انستغرامهم
flower_latte

Health Studio مطعم

اللي مسوي دايت أصعب لحظة تمر عليه لما يصير بخاطره ياكل برا البيت بس ما يدري وين يروح

في الجابريه افتحوا قبل مدة مطعم يديد اسمه
Health Studio

المطعم متخصص بأكل الدايت و تحصلون فيه منيو منوع من الاكلات اللي تناسبكم من سندويشات و اطباق و حتى السوشي بعد

و بما إن الوضع دايت هالأيام قلت نجرب المطعم و نشوف .. أجواءه حلوه و قعدته شرحه و في قعده خارجية بعد حق الجو الحلو

طلبت لي ساندويش الحلوم مع عصير الجزء و البرتقال

صاحبي طلب له هذا طبق سلايدر الدجاج مع شوية بطاط

اكلهم حلو و ناطع و لذيذ انصح فيه اللي مسوين دايت او يدورون اكل خفيف ما يبون يثقلون

هيلث ستديو مكانهم الجابريه قطعه 3 أ ورا ماكدونالدز

انستغرامهم

healthstudiokw

Bao مطعم

من المطاعم اللي زرتها مؤخرا مطعم

Bao

و مكانه في منطقة شرق في مدينة الكويت قرب دوار المخفر

المطعم موقعه صغير تقريبا و هذي طبيعة اغلب المطاعم في الفترة الاخيرة ، بالنسبة لي مو مهم حجم المكان المهم جودة الاكل و لذتها

المطعم نظيف و مرتب و هادي .. جربنا عندهم المقبلات و السلطة

المقبلات كانت لذيذة بس السلطة ما عجبتنا وايد ،، و تالي طلبنا الشي المميز عندهم وهو

Crispy Chicken Bao – Dynamite Shrimp Bao

الاكل كان لذيذ و خفيف .. المشروبات اللي عندهم الصودا بأنواعها أو العصاير الفريش

و طلبنا الحساب و الفاتورة كان سعرها معقول و أسعارهم معقولة

مطعم Bao
موقعهم منطقة شرق – مدينة الكويت
انستغرامهم
@bao.kw

شاليهات هيلتون الكويت

اليوم بكتب لكم عن مكان مميز في الكويت .. سواء لزوار الكويت أو لأي شخص عايش في الكويت

منتجع هيلتون الكويت

واللي موقعه في منطقة المنقف

يحتوي المنتجع على غرف فندقية و على شاليهات .. بعضها يقع في الجهة المطلة على البحر و بعضها في الجهة الخلفية و تطل على الحديقة

تنقسم الشاليهات المطله على البحر الى نوعين من الشاليهات .. الشاليهات الرئاسية و الشاليهات الملكية .. الاختلاف بينهم بالحجم و وجود مسبح خاص في الشاليهات الملكية

حجزنا انا و الاهل و رحنا و تعمدنا نحجز أيام الاسبوع علشان نتجنب الازعاج و علشان نقضي ايام هاديه و نسترخي بعيدا عن لوية الناس

حجزنا شاليه رئاسي يطل على البحر مع الافطار لمدة خمس ايام و السعر طلع علينا تقريبا ألف و شي كويتي

يتكون الشاليه من طابقين و فيه أربع غرف تكفي لثمان اشخاص بالاضافه لغرفة للخادمة

 

الغرفة الماستر مطلعه على البحر و فيها خزانة داخليه و حمام ماستر داخلي

القعده في البلكونة عجيبه و تشرح الصدر

الخدمة عجيبه و ما يقصرون اي شي تبونه ايون يسوونه .. تنظيف – تصليح – ترتيب – خدمتهم اول بأول

القعدة على البحر عجيبه و تقدرون تأجرون قوارب صغيرة و تسبحون

يا زين القعده و الاسترخاء

من الشغلات الحلوة اللي سويناها جمعت الاهل و حطيت لهم فيلمي المفضل
The Bodyguard

الريوق في المطعم داخل الفندق عجيب و منوع و البوفيه مفتوح و على كيفكم

على فكره اذا عندكم شخص كبير بالعمر تقدرون تطلبون من المطعم اييبون لكم الريوق للشاليه مثل ما صار معانا

من الشغلات اللي تقدرون تسوونها بعد تحجزون لكم جلسة مساج و تسترخون

و في الليل تحلى القعدة في البلكونة و الشوي و الاجواء العائلية الحلوة

منتجع هيلتون الكويت مكانه في منطقة المنقف

انستغرامهم
@hiltonkuwaitresort

The Nun فيلم

من الافلام اللي كنت منتظرها هالسنه فيلم الرعب 

The Nun

اللي يعتبر واحد من سلسلة افلام

The conjuring

في الفترة الاخيرة صاير وايد اروح سينما جراند في مجمع الحمرا .. يمكن مرتاح اكثر و يمكن لأن التنظيم اكثر

اللي يميز سينما جراند صالاتها الواسعه و كراسيها المريحة .. تخليك تندمج بالفيلم

نرجع للفيلم .. قبل ما اروح اشوفه اختلفت اراء الناس حوله و البعض قال ان عادي و ما يخوف و اقل مما كنا نتوقع

الفيلم بالنسبه لي كان جيد جيدا و مكمل لسلسلة الافلام اللي ذكرتها

القصه كانت حلوه و مرتبه و حبيت تسلسل الاحداث فيها و كمية الرعب بالفيلم ما كانت قليله ابدا و هذا أهم شي بأي فيلم مرعب

الفيلم حلو اللي ما شافه يروح يشوفه .. محبين افلام الرعب راح يقدرون قيمة الفيلم و التفاصيل اللي فيه

تقييمي له 7 من 10

يعيب الفيلم المط شوي في الاحداث

اعلان الفيلم

مؤتمر أبل 2018

كعادتها أبل في شهر سبتمبر من كل عام تقيم مؤتمر تعلن فيه الجديد عن أجهزتها و طبعا محبين أبل ينتظرون هالمؤتمر كل عام على احر من الجمر .. في المؤتمر الذي أقيم يوم 12 سبتمبر 2018 أعلنت أبل عن ثلاث أيفونات و جيل جديد من ساعتها
apple watch series 4


ساعة أبل الجديدة فيها ميزة عمل تخطيط للقلب من خلال الضغط على زر الساعة الجانبي .. و ممكن ترسل لدكتورك رسم التخطيط خلال ثواني و من خلال الساعه

أما أجهزة الايفون فكانت :
iphone x s – iphone x s Max – iphone XR

 لكل جهاز مواصفاته الخاصه و المتجددة
و أكيد دقة أكثر في كواليتي الشاشة و دقة عدسة التصوير

بالنسبة لي شدني
iphone x s Max

كحجم و كمميزات

و انتو شنو عجبكم ؟

ستاربكس شرق – مستشفى الأميري

كوني من عشاق ستاربكس فأحرص دايما على زيارة أفرعه الجديدة عندنا في الكويت .. و مؤخرا تم افتتاح فرع جديد في منطقة شرق بالقرب من مستشفى الأميري ، اللي شدني إني أروح أغطي الموقع الجديد هو إن المكان أساسا عبارة عن بيت عربي – كويتي قديم و تم تحويله إلى أحد أفرع ستاربكس .. القعدة داخل عجيبه وسط حوش واسع و مغطى و الحلو إن في منور أو نوافذ زجاجية في السقف علشان يدخل النور في النهار و أيضا في قعدة خارجية حلوه .. أتركم مع الصور

موقعهم منطقة شرق  – بجانب مستشفى الأميري